அழகாய் ஒரு விருந்தாளி

அழகாய்

ஒரு விருந்தாளி

எப்போதோ பார்க்கும் தும்பி என்பதால்

சற்று ரசித்து இருந்துவிட்டேன்

நாக்கை குழைத்துக் கொண்டு வருகின்றான்

விடாக்கண்டன்

மழைக்கு முன்னே வரும்

விட்டில் பூச்சிகளுக்கே

வாலை ஆட்டிக்கொண்டு

விருந்துண்ண வந்துவிடுவான்

எப்போதோ கிடைக்கும் தும்பி என்பதால்

வேகமாய் வருகிறேன்

மனசு படபடக்க

விளக்கின் மேல்

ஒய்யாரமாய் உட்கார்ந்து இருக்கும்

தும்பிக்கு கை அசைக்கிறேன்

வலிக்குமோ என்று

துண்டால் வீசியும் துரத்தினேன்

என் மனம் அறிந்தானோ

வேகமாய் வந்துவிட்டான்

கண் இமைக்கும் நேரத்தில்

என் எண்ணத்தையும் தாண்டி

நாக்கால் லாவகமாய்

இழுத்துக் கொண்டான்

மெல்ல ருசித்து விழுங்குவதை

அழகாய் சிலிர்த்த இறகுகள் மறைவதையும்

வண்ணம் குடி கொண்ட வால் காணாமல் போவதையும்

பார்த்துக்கொண்டே இருக்கின்றேன்

நீ விருந்தாளி

அவன் பல்லி என் அறைத்தோழன்